(၁၅) ကြိမ်မြောက် တိုင်းရင်းဆေးသုတေသနစာတမ်းဖတ်ပွဲ(ဒုတိယနေ့)ကို (၁၉-၈-၂၀၂၆) ရက်နေ့ နံနက်(၀၉:၀၀)နာရီအချိန်တွင် မန္တလေးမြို့တော်စည်ပင်သာယာရေးကော်မတီ၊ မြို့တော်ခန်းမ၌ ဆက်လက်ကျင်းပရာ စာတမ်း (၈)စောင်အား စာတမ်းရှင်များက စာတမ်းများကို တင်သွင်းဖတ်ကြားကြပြီး တက်ရောက်လာသူများမှ ဝိုင်းဝန်း ဆွေးနွေးခဲ့ကြသည်။
ထို့နောက် စာတမ်းဖတ်ပွဲပိတ်ပွဲနှင့် ဆုချီးမြှင့်သည့် အခမ်းအနားကို ကျင်းပရာတိုင်းရင်းဆေး ပညာဦးစီးဌာန၊ ညွှန်ကြားရေးမှူးချုပ် ဒေါက်တာထွန်းမင်း က အခုလို စာတမ်းနှင့် ပိုစတာများ တင်သွင်းဖတ်ကြားပေး ကြတဲ့ ကျန်းမာရေးဝန်ကြီးဌာနအောက်ရှိ တိုင်းရင်းဆေးပညာဦးစီးဌာန၊ တိုင်းရင်းဆေးတက္ကသိုလ်၊ ဝန်ကြီးဌာနများဖြစ်သော ကာကွယ်ရေးဝန်ကြီးဌာန၊ ပညာရေးဝန်ကြီးဌာန၊ သိပ္ပံနှင့်နည်းပညာ ဝန်ကြီး ဌာနတို့မှ သုတေသီများကို အထူးပင် ကျေးဇူးတင်ရှိကြောင်းနှင့် နောက်နှစ်တွေမှာလည်း စာတမ်း များ၊ ပိုစတာများကို တင်သွင်းဖတ်ကြားပေးဖို့ အလေးထားဖိတ်ခေါ်ကြောင်း၊ စာတမ်းများ ဖတ်ကြားရာတွင် သဘာပတိအဖြစ် ဆောင်ရွက်ပေးကြသော ဆရာကြီး၊ ဆရာမကြီးများနှင့် အားတက်သရော ဝိုင်းဝန်းဆွေးနွေး အကြံပြုပေးကြသူများကိုလည်း ကျေးဇူးအထူးတင်ရှိကြောင်း၊ တစ်နှစ်ထက်တစ်နှစ် အရည်အသွေးပြည့်ဝပြီး ပိုမိုကောင်းမွန်သည့် စာတမ်းများ၊ ပိုစတာများကို ဆောင်ရွက်နိုင်ကြလိမ့်မယ်လို့ ယုံကြည်ကြောင်း၊ စာတမ်းဖတ်ပွဲအောင်မြင်စွာကျင်းပနိုင်ရန်အတွက် အဖက်ဖက်မှ ဝိုင်းဝန်းကူညီပံ့ပိုးပေးခဲ့ကြတဲ့ ကျေးဇူးတင်ထိုက်သူများအားလုံးကို အထူးပင် ကျေးဇူးတင်ရှိပါကြောင်းနှင့် နောင်နှစ်တွေမှာလည်း အခုလို စည်းစည်းလုံးလုံးညီညီညွတ်ညွတ်နဲ့ ဝိုင်းဝန်းကူညီဆောင်ရွက်သွားကြဖို့ တိုက်တွန်းလိုပါကြောင်း ပြောကြားသည်။
ဆက်လက်၍ အကောင်းဆုံး စာတမ်းဆု၊ ပိုစတာဆုများ စိစစ် ရွေးချယ်ရေးဆပ်ကော်မတီ ဥက္ကဋ္ဌက အခြေခံတိုင်းရင်းဆေးသုတေသနစာတမ်းအကောင်းဆုံးဆု (ပထမ၊ ဒုတိယ၊ တတိယ) ၊ အသုံးချတိုင်းရင်းဆေး သုတေသနစာတမ်း (ပထမဆု၊ နှစ်သိမ့်ဆု (၂)ဆု)၊ ကျန်းမာရေးစနစ်သုတေသနအကောင်းဆုံးဆု (ပထမ၊ ဒုတိယ၊ တတိယ) နှင့် ပိုစတာ အကောင်းဆုံးဆု (ပထမ၊ ဒုတိယ) ဆုများကို စိစစ် ဆုရွေးချယ်ခြင်းနှင့် ပတ်သက်၍ ရှင်းလင်းပြောကြားပါသည်။ ဆက်လက်ပီး အစီအစဉ်အားဆက်လက်ကျင်းပရာ ဆုရရှိသောစာတမ်းရှင်များအား ဆုချီးမြှင့်ငွေနှင့် ဂုဏ်ပြုမှတ်တမ်းလွှာများကို ညွှန်ကြားရေးမှူးချုပ် နှင့် ဆုချီးမြှင့်ရေးဆပ်ကော်မတီမှ တာဝန်ရှိသူများက ပေးအပ်ချီးမြှင့်ခဲ့ပီး၊ ဆုရစာတမ်းရှင်/ပိုစတာရှင်များနှင့် မှတ်တမ်းတင်ဓာတ်ပုံ များရိုက်ကူးပြီး (၁၆:၃၀)နာရီအချိန်တွင် အခမ်းအနား အောင်မြင်စွာပြီးမြောက်ပါသည်။
- Hits: 94
